ESKOLAR II

Busa, aron mamahimong labaw sa tanang tawo,

Kinahanglan nga ibutang niya ang iyang kaugalingon ilalom nila.

                                                                                                Tao Te Ching, kap. 66

            Kini nga linya gipakita ni Lao Tzu nga ang usa ka tigdumala sa katawhan kinahanglan nga mahimong labaw sa tanang tawo. Aron mahimong labaw sa katawhan, kinahanglan niya ang magpaubos kanilang tanan. Kining pagpaubos nanginahanglan gayud og pagkamainubsanon sa kaugalingon ug kayano. Tungod kining mga kinaiya, dakong tabang aron kanunay nga maibutang sa tawo ang iyang pagkabutang ubos sa kadaghanan.

            Kon kanunay nga anaa sa ubos ang tawo walay mga tawo nga buot makigsumpaki kaniya. Adunay mga tawo lamang nga makigsumpaki gayud niya tungod sa iyang pagpaninguha sa mga butang nga dili niya kinahanglan, hilabina kadtong mga butang ginapaninguhaan usab sa tanang tawo. Kon adunay pagkakontento ang tawo sa kon unsay anaa kaniya, dili na siya maninguha pa’g laing butang nga dili niya kinahanglan. Pinaagi niini, dili na niya kinahanglan nga makigkompetensya sa laing tawo aron makuha kadtong mga ginapaninguha niya.

            Busa, importante gayud kon adunay pagka-kontento ang eskolar sa iyang mga kaugalingong butang. Dili na siya kinahanglang nga maninguha og mga dili na kinahanglan. Tungod kontento na gayud siya sa kon unsa ang dagan sa Tao nga maoy iyang pundasyon sa pagdumala sa katilingban.