KUMPYANSA

Ang tawo nga gakumpyansa sa mga butang makasinati ug labaw pang kalisod.

                                                                                                Tao Te Ching, kap. 63

            Niining linyaha gipakita ang usa sa mga dili angay nga kinaiya kon nagasubay kita sa dalan sa Tao. Sa akong gisaysay niadtong mga niaging adlaw, anaa ang pagkamaandamon sa tawo nga aron mabuhat niya ang mga butang nga walay lihok, wu-wei. Karon, gipakita ni Lao Tzu ang nga kon kumpyansa kita mas makasinati kita’g dagkong problema o kabalaka. Pwede usab nga kon kumpyansa kita dili kita magmaandamon sa mga butang nga kinahanglan buhaton. Kon adunay pagkumpyansa sa mga butang, moabot ang tantong panahon nga magkara-kara kita ug daghan na kaayo ta’g mga buhaton. Dili gayud lalim magbuhat og mga butang kon nagkara-kara ta tungod dili han-ay ang dagan sa atong panghuna-huna.

            Apan, kon wala kita gakumpyansa sa mga butang aduna kitay pagpangandam. Usab, kon wala ta gakumpyansa atong gahinan nato’g panahon ang atong susihon kadtong nga kinaiya sa atong Te nga nagasubay sa Tao. Busa, kining pagpamalandong sa kaugalingong Te kinahanglan kini og oras, pagpangandam. Ugbp.

            Busa, ang kinaiya sa mga tawo nga gasubay sa dalan sa Tao kay wala gakumpyansa sa mga butang. Tungod kon adunay kumpyansa magtinapol nga molihok ang tawo. Dili na kini mangandam, magbuhat og lihok nga iyang kinahanglan buhaton, ubgp. Kon buhaton kini sa tawo, moabot ang tantong panahon nga mahitano kadtong iyang ginakumpyansaan dili na niya mabuhat sa tantong pamaagi ang butang nga iyang buhaton.