ESKOLAR IV

Ayaw pagamya ang lugar nga ilang ginapuy-an.

Ayaw panghilabot sa ilang kinabuhi.

                                                                                                            Tao Te Ching, kap. 72

            Kini nga linya mao ang pahimangno ni Confucius sa mga tawo nga buot modumala sa katilingban o sa kadaghanang tawo. Dili niya buot nga manghilabot ang mga modumala sa kinabuhi sa laing tawo. Kining pagpanghilabot nakita kini sa pagpangulekta og dagkong buhis sa mga pamilya kon naglisod sila nga magpadayon sa pagpanginabuhi. Kining pagpangulekta og dagkong buhi gikan kini sa pagpaninguha ug mga butang nga sobra na gayud sa kinahanglan sa tigpangulekta.

            Dili gayud ingon-ani ang kinaiya nga buot makita ni Lao Tzu sa mga eskolar. Tungod ang eskolar nga tigdumala dili gayud mangulekta og buhis nga sobra o dako. Tungod ang iyang kinahanglan kato lamang mga buhis nga kinahanglan sa katilingban. Walay labot sa pagpangulekta og buhis ang iyang pangkaugalingong interes. Busa, ginalimud gayud ni Lao Tzu ang mga ingon-aning pamatasan. Mao nang dako ang iyang paghatag og importansya kon moundang ang tawo sa pagpaninguha sa mga dili kinahanglan tungod maghatag lamang kini og kagubot sa katilingban.

            Busa, alang kang Lao Tzu ang tigdumala dili kinahanglan nga mahimong maninguhaon sa mga butang nga dili niya kinahanglan. Tungod basin moresulta kini sa pagpamugos sa laing tawo. Mao nang alang kang Lao Tzu importante gayud ang kayano, ang pagkakontento sa kon unsa ang gihatag sa Tao o gipakita sa Tao kaniya.