ANG WU-WEI

            Alang kang Lao Tzu, ang pamaagi aron hapsay ang lihok sa tanang tawo nga kon asa nahisubay ang tanang anaa sa Tao mao ang paglihok nga walay lihok. Apan, alang kang Lao Tzu kining lihok nga walay lihok dili pasabot nga wala nay buhaton ang tanang tawo. Adunay duha butang ang buot ipasabot ni Lao Tzu kanato.

            Una, mao ang paglihok nga walay lihok kon asa sa pamaagi niini dili na kita mobuhat og laing butang. Kining laing butang mao kini ang mga butang nga pwede mosupak sa lihok sa pamaagi sa kinaiyahan kon asa makita sa tawo ang lihok sa Tao. Kon walay lihok nga buhaton ang mga tawo nga wala gasupak sa Tao, atong mabuhat ang labing labaw nga pamaagi sa pagpuyo sa kinabuhi.

            Ikaduha, kining paglihok nga walay lihok gapasabot sa paglihok sa usa ka tawo nga kinahanglan lamang niyang buhaton, kadtong mga buluhaton nga angay lamang niyang buhaton. Tungod kon mobuhat siya’g mga buluhaton nga lapas sa iyang kaugalingong kusog makahatag kini’g dili maayong epekto kaniya. Usab, kon mobuhat kita’g mga butang nga lapas sa atong kaugalingong kusog adunay posibilidad nga atong masupak ang pamaagi sa kinaiyahan.

            Busa, ang hapsay nga lihok alang kang Lao Tzu aron mahisubay kita sa Tao mao ang paglihok nga walay lihok. Pinaagi niini, atong mapasagdan ang kinaiyahan nga mobuhat sa natural niya nga lihok.