PAGTUON UG PAGTINGUHA

            Giingon ni Lao Tzu nga adunay dili maayong maidangat sa tawo ang pagtuon. Kon asa iyang mahatagan og dakong kalahian ang usa ka butang sa butang nga nagakontra niini. Pananglitan, ang mahitabo sa panghuna-huna sa tawo, kon makabalo kita sa lasa sa tam-is nga pagkaon ato kining hatagan og dakong kalahian sa pait nga pagkaon. Pinaagi niini, atong mahatagan ug dili maayong pagtan-aw ang kadtong mga butang nga dili nato ganahan. Mas atong hatagan og panahon nga tun-an ug mahibaw-an kadtong mga butang nga tuo nato nga nindot. Apan, dili kini maayo tungod mas atong ginahatagan og bili kadtong mga tuo nato nga nindot lang. Susama pa sa akong giingon, ang tanang butang gikan sa Tao ug kon hatagan og kalahian ang butang nga magka-atbang atong ginakontra ang pamaagi sa Tao tungod wala nato ginahatagan og pagtangad ang pagkasakop sa mga butang nga atbang atong tuo nato nga nindot, nga kon buot huna-hunaon sakop sila sa pagka-Tao sa Tao.

            Sa ingon-ani nga pamaagi, makuha sa tawo nga maninguha sa mga butang nga tuo nila nga nindot. Alang kang Lao Tzu, dili maayo ang maninguha tungod maghatag kini og dili maayong epekto sa tawo. Mahimo kitang mahakugon nga mga tawo kon asa sa atong pagkmahakugon atong ginasubay lamang ang pamaagi sa atong kagustuhan ug dili ang pamaagi sa kinaiyahan. Ang hakog nga tawo iya lamang hatagan og importansya ang mga butang nga makakontento sa iyang kaugalingong kadalo. Dili usab kining maninguhaon kita tungod atong buhaton ang tanan alang makuha lamang kadtong mga butang  nga makapalipay sa atong kaugalingon lamang. Bahala na’g adunay dautan nga mahitabo sa tawo ugbp. ang importante makuha nako kadtong mga butanga.

            Ang pagtuon nga kinahanglan nganhi mao ang paghatag og kahulogan sa usa ka butang kon asa ang aduna usab kaugalingong  kahulogan. Tungod kon atong ilimod kadtong kaatbang sa mga butang nga tuo nato nga nindot, ginakuha nato ang kahulogan sa pagka-anaa niini.