YIN-YANG

            Daghang mga butang ang atong nakita nganhi sa kalibutan. Lakip sa atong nakita niini mao ang mga butang nga gahatag og kanindot sa kalibutan, nga maoy nagapabusog sa atong panan-aw. Apan, aduna koy pangutana bahin niining mga butang nga atong ginatuohan nga nindot. Unsay sukdanan sa ka nindot sa usa ka “nindot” nga butang?

            Kon akong gamiton ang panghuna-huna ni Lao Tzu, siguro dili angay nga nganlan ang mga butang og nindot ug nganlan og maot kadtong mga kaatbang niini. Ang tanang butang nga anaa gikan gayud sa nag-inusarang labaw nga Tao kon asa ang iyang ginahatagan og lihok sa pagkahiusa ang tanang anaa nganhi sa kalibutan.

            Atong dawaton nga adunay mga butang nga magka-atbang apan dili kinahanglan nga atong hatagan og dakong kalahian kining magkaatbang. Kinahanglan ato silang tratuhon nga nagahatag og kahiusahan usa’g usa., kon wala ang usa wala usab ang usa. Susama na lamang sa mga “tisay” ug “negra”. Atong ginahatagan og dakong kalahian kining duha. Tuo nato nga ang mga tisay kay baligtad sa mga negra. Apan, sa lihok sa Tao dili gayud maayo tungod ang tisay adunay kuwang nga kanegra o kaitom.

            Busa, ang tanang butang dili angay tratuhon nga mga butang nga nagkalahi sa usa’g usa. Apan, kinahanglan nga atong tan-awun ang kaatbang niini. Kon atong nahatagan og kahulogan ang usa ka butang kinahanglan nga ang kaatbang niini hatagan usab nato’g kahulogan.