ANG PAGPANGHILABOT SA MGA NAGDUMALA

Mamatay ang mga tawo sa gutom kon sobra ang buhis ang ginakolekta sa mga tagapangulo.

Lisod ang pagdumala sa mga tawong gutom.

Tungod sa panghilabot sa mga nagdumala,

Mao nang garebelde sila.

Dili sila hadlok mamatay,

Tungod buot nila nga mabuhi nga malinawon;

Mao nang ginabaliwala nila ang kamatayon.

Apan mas dako ang bili sa kinabuhi

Alang sa mga tawo nga nanlimbasug sa kamatayon tungod sa ilang paninguha nga mabuhi,

Kaysa mga tawong nanghilabot sa kinabuhi sa laing kinabuhi.

                                                                                                            Tao Te Ching, kap. 75[i]

           

            Niining kapituluha sa Tao Te Ching ni Lao Tzu, atong makita ang pagkamahilabtunon sa mga tagapangulo tungod ilang ginahilabtan ang kinabuhi sa laing tawo pinaagi sa pagpaningil og dagkong buhis. Usab kining pagpaningil og buhis kay usa ka kapintas tungod motulak kini sa pagkagutom sa mga tawo og hinay-hinay sila nga nangamatay. Tungod niini gabuhat sila’g lihok sa pag-alsa o pagrebelde tungod nasinati sa mga tawo ang dili pagkamatinarungon sa mga nagdumala.

            Sa ingun-aning sitwasyon atong makita kon unsa gayud ang pagkawala sa panag-uyon sa katilingban. Siguro, alang kang Lao Tzu ang usa sa mga hinungdan o gamut sa pagkawala sa panag-uyon kay mismo ang pagpanghilabot sa mga tagapangulo sa kinabuhi sa laing tawo. Kon atong huna-hunaon og tarong, ang usa ka tarong nga nagdumala dili mobuhat og mga butang susama sa pagpangolekta og sobrang buhi ug lain pang butang mga makahatag og dili maayong resulta alang sa kadaghanang tawo. Kay ang usa ka tarong nga nagdumala mobuhat og mga butang nga maoy makahatag og kaayuhan sa katawhan aron dili mawala ang panag-uyon sa katilingban. Kay kon dili maayo ang buhaton, mopatigbabaw gayud ang panagbangi sa katilingban nga maoy usa sa mga problema nga nakita ni Lao Tzu kaniadto.

            Busa, sa pamaagi nga manghilabot ang mga nagdumala sa kinabuhi sa laing tawo maghatag kini og panagbangi o pagkawala sa panag-uyon tungod kining panghilabot gapasabot og dili maayong epekto alang sa mga tawo og mahulog kini sa kagubot sa katilingban.

                       

---

[i] Timbreza, F. (1999). Ang Tao Te Ching ni Lao Tzu sa Filipino. 2504 Leon Guinto, Malate 1004, Maynila, Pilipinas. De La Salle University Press, Inc. p. 234